Tesla ရဲ့ ဆိုက်ဘာထရပ်ကို ကြိုတင်မှာယူမှု ၂၀၀,၀၀၀ နီးပါးရှိနေဟု အီလွန်မက်စ်ပြောကြား

လွန်ခဲ့တဲ့ ၂ ရက်က Tesla ဟာ ဒီဇိုင်းပိုင်းဆန်းကြယ်တဲ့ ဆိုက်ဘာထရပ်ကား ထုတ်ဖော်မိတ်ဆက်ခဲ့ပါတယ်။ ဆိုက်ဘာထရပ်နဲ့ပတ်သက်တဲ့ သတင်းနဲ့ ဓာတ်ပုံတွေ အင်တာနက်မှာ ပျံ့နှံ့ခဲ့ပါတယ်။ အခုဆိုရင် Tesla အနေနဲ့ ဆိုက်ဘာထရပ်ကို ကြိုတင်မှာယူ ဝယ်လိုတဲ့ အမှာစာ ၁၄၆,၀၀၀ လက်ခံရရှိထားတယ်လို့ အီလွန်မက်စ်က twitter မှာရေးသားခဲ့ပါတယ်။ ကြိုတင်မှာယူမှုတစ်ခုစီတိုင်း အတွက် ဒေါ်လာ ၁၀၀ ပေးရမှာ ဖြစ်ပြီး ကြိုက်တဲအချိန်မှာ ပြန်လည်ထုတ်ယူနိုင်ပါတယ်။ အခုဆိုရင် ဆိုက်ဘာထရပ် ကြိုတင်မှာယူမှုတွေကြောင့် ၄၈ နာရီအတွင်း Tesla ဘဏ်အကောင့်မှာ ဒေါ်လာ ၁၄.၆ သန်းအထိ ရှိနေပါတယ်။

Tesla အနေနဲ့ ဆိုက်ဘာထရပ်ကို ဗားရှင်း ၃ မျိုးထုတ်လုပ်မှာ ဖြစ်ပါတယ်။ နောက်ရပ်မော်တာတစ်လုံးပါဝင်ပြီး မိုင် ၂၅၀ အထိ မောင်းနှင်နိုင်တဲ့ ကားကို ဒေါ်လာ ၃၉,၉၀၀ နဲ့ရောင်းချမှာ ဖြစ်သလို လေးဘီးရပ်မော်တာ ၂ လုံးပါဝင်ကာ မိုင် ၃၀၀ အထိ မောင်းနှင်နိုင်တဲ့ ဗားရှင်းကို ဒေါ်လာ ၄၉,၉၀၀ နဲ့ရောင်းချမှာ ဖြစ်ပါတယ်။ လေးဘီးရပ်မော်တာ ၃ လုံး ပါဝင်ပြီး မိုင်၅၀၀ အထိ မောင်းနှင်နိုင်တဲ့ မော်ဒယ်ကို ဒေါ်လာ ၆၉,၉၀၀ နဲ့ရောင်းချမှာ ဖြစ်ပါတယ်။ ကြိုတင်မှာယူမှု ၄၂ ရာခိုင်နှုန်းက မော်တာ၂ လုံးမော်ဒယ်ဖြစ်ကာ ၄၁ ရာခိုင်နှုန်းက မော်တာ ၃ လုံးနဲ့ ၁၇ ရာခိုင်နှုန်းက မော်တာတစ်လုံး မော်ဒယ်တွေ အသီးသီးမှာယူထားတာ ဖြစ်တယ်လို့ အီလွန်မက်စ်ကပြောခဲ့ပါတယ်။

“ကြော်ငြာနဲ့ ငွေပေးချေရမယ့် ထောက်ခံချက်မရှိဘူး” လို့ အီလွန်မက်စ်က twitter မှာရေးသားခဲ့ပါတယ်။

ဆိုက်ဘာထရပ်ကို ကြိုတင်မှာယူသူတွေအနေနဲ့ ကားကို လက်ဝယ်ပိုင်ဆိုင်ဖို့ အချိန်အတိုင်းအတာ တစ်ခုအထိ စောင့်ဆိုင်းရဦးမှာ ဖြစ်ပါတယ်။ မော်တာ ၁ လုံးနဲ့ မော်တာ၂ လုံးပါဝင်တဲ့ မော်ဒယ်တွေကို၂၀၂၁ ခုနှစ်မှ စတင်ထုတ်လုပ်သွားမှာ ဖြစ်ကာ မော်တာ ၃ လုံးမော်ဒယ်ကိုတော့ ၂၀၂၂ ခုနှစ် နှောင်းပိုင်းမှပဲ ထုတ်လုပ်မှာ ဖြစ်ပါတယ်။

စိုးထက်
Ref: TheVerge